ध्यानाचे आधारस्थान गुरुमूर्ति होय. पूजेचे मूलस्थान गुरुचरण, मंत्राचे उगमस्थान गुरुवाक्य, मोक्षाचा मूलाधार गुरूची कृपा होय. साधक आध्यात्मिक मार्गाला लागला की त्याला प्रश्न पडतो, कोणाचे ध्यान करावे, कोणाची पूजा करावी. कोणता मंत्र जपावा व मोक्षापर्यंत कसे जावे. ह्या साऱ्या प्रश्नांची उत्तरे हा एक श्लोक देत आहे. सगुण भक्ति सुलभ व दीर्घकाल साधली की तिची परिणती निर्गुणांत होतेच, त्यांतही गुरूमूर्तीचे ध्यान सर्वांत अति सुलभ. गुरूला व्यक्ति म्हणून आपण पाहिलेले असते, गुरू इंद्रियगोचर असतो, त्यामुळे मनाला गुरुठायी एकचित्त होणे कठीण पडत नाही. पुन्हा गुरू हा देवाधिदेव, महादेव असतो. एका गुरुमूर्तीध्यानांत इतर साऱ्या देवदेवतांची आराधना आपोआपच होते. ध्यान करायचे ते गुरुमूर्तीवरच करावे. गुरुचरणपूजनांत साऱ्या प्रकारच्या पूजा अंतर्भूत होतात. मुळाला पाणी घातले की शाखापल्लव आदि सर्वांना पाणी मिळते, तद्वत् गुरुभक्तीने सर्व प्रकारची साधना आपोआपच होते. वेगळे प्रयत्न करावे लागत नाहीत. कारण गुरू हेच सर्व साधनांचें मूळ व फळ असतें. गुरू हेच साध्य. गुरू हेच साधनही. साध्य, साधना, साधक ही त्रिपुटी गुरूमध्ये एक होते. अद्वैतापर्यंत जाण्याचा अति जवळचा व लांब नसलेला मार्ग म्हणजे गुरुभक्ति होय, यांत मुळीच संदेह नाही. गुरुवाक्य मंत्रवत् असते. गुरुवचनांवर मनन केल्याने साधकाचा मंत्र, जप झाल्यासारखेच होते. गुरुमुखांतून निघणारे बोल परतत्त्वाला स्पर्श करून येतात. गुरुवाणी दिव्य वाणी असते. गुरुवचन हृदयवीणेचा झंकार असते. त्यामुळे गुरुवाक्याला मंत्राचें सामर्थ्य प्राप्त होते. गुरूचे कोणतेही बोल निरर्थक नसतात. साधकाच्या जीवनाला परम अर्थ आणून देणारे ते असतात. गुरुवचनांची हयगय करूं नये, त्यांवर मनन व त्या आदेशानुसार वर्तन ठेवावे. गुरुवाणी साधकाची तारक, रक्षक असते. मुमुक्षूला तर गुरुकृपा हीच मोक्षाकडे नेणारी एकमेव साधना. गुरुकृपा व मुक्ति दोन नाहीत. गुरुकृपापात्र साधक मोक्षाचाही अधिकारी होतोच. गुरुकृपा म्हणजे कुंडलिनीशक्तिप्राप्ती. कुंडलिनीजागृति गुरुकृपेविना होत नाही. चित्ताने ध्यान कोणाचे करायचे तर गुरुमूर्तीचे, इंद्रियांनी पूजा कशाची करायची तर गुरुचरणांची, मनाने मनन कशाचे करायचे तर गुरुवचन मोक्षप्राप्तीचा उपाय काय तर गुरुकृपा ह्याप्रमाणे एकाच श्लोकांत देहमनबुद्धि वापरून अनेक साधना गुरुभक्तीत कशा केंद्रित होतात ते अति स्पष्टपणे प देण्यांत आले आहे. या श्लोकाचा मंत्राप्रमाणे उपयोग करावा, इतका हा मह आहे.